ძილი ერთ-ერთი ყველაზე მნიშვნელოვანი აქტივობაა, რასაც ჩვენ ყოველდღიურად ვახორციელებთ. ეს ის პროცესია, როდესაც ორგანიზმი ისვენებს, ხდება ქსოვილების განახლება, დღის განმავლობაში მიღებული ინფორმაციის გადამუშავება, ენერგიით ხელახლა ავსება. ადამიანი თავისი ცხოვრების საშუალოდ ერთ მესამედს ძილში ატარებს. ძილის პროცესი გარეგნულად უმოქმედობით ხასიათდება, თუმცა მას აქვს 4 ძირითადი ფაზა:

I ფაზა - ჩაძინება: პერიოდი სიფხიზლესა და ძილს შორის. ამ დროს კუნთები დუნდება; გულისცემა, სუნთქვა და თვალების მოძრაობა ნელდება. ეს ჩვეულებრივ რამოდენიმე წუთს გრძელდება.

II ფაზა - მსუბუქი ძილი: ამ დროს გულისცემა და სუნთქვა კიდევ უფრო ნელდება, კუნთებიც უფრო მოდუნებულია და იკლებს სხეულის ტემპერატურაც. ეს ეტაპი ყველაზე ხანგრძლივია ძილის ეტაპებიდან.

III ფაზა - ეს ეტაპი მნიშვნელოვანია, რომ მეორე დღეს თავი ენერგიულად იგრძნოთ. ამ დროს გულისცემა, სუნთქვა და ტვინის ტალღების აქტივობა მინიმუმამდეა დაყვანილი.

IV ფაზა - ძილის ამ ეტაპზე ტვინის აქტივობა მატულობს და უახლოვდება იმ დონეს, რგორც გვაქვს სიფხიზლისას. ძილის ეს ეტაპი აუცილებელია კოგნიტური ფუნქციებისათვის.

სიზმრები შეიძლება ვნახოთ ძილის ნებისმიერ ეტაპზე, თუმცა ისინი შედარებით ინტენსიურია ბოლო ეტაპზე.

ძილის სწორი რეჟიმი მნიშვნელოვანია დღის პროდუქტულად გატარებისათვის. რაც უფრო პატარაა ადამიანი, მას მით უფრო მეტი ძილი სჭირდება.

რეკომენდაციები სწორი ძილისთვის:

• დაძინებისათვის იდეალური პერიოდია 10-დან 11 საათამდე.

• დაიძინეთ და გაიღვიძეთ ერთსა და იმავე დროს. ეს დაგეხმარებათ ორგანიზმის ბიოლოგიური საათის რეგულირებაში.

• დაძინებამდე დაახლოებით 1 საათი დაუთმეთ დამამშვიდებელ აქტივობებს მაგალითად კითხვას, მსუბუქი მუსიკის მოსმენას.

• ივარჯიშეთ ყოველდღიურად. მაგრამ არა ძილის წინ.

• შექმენით ოთახში ძილისთვის შესაბამისი პირობები: ტემპერატურა 16-20 გრადუსი. გამორთეთ ლურჯი განათება.

• გამოიყენეთ სინათლე დღე-ღამური რიტმის მოსაწესრიგებლად.

• მიირთვით ძილამდე 2-3 საათით ადრე.

ავტორი: ქეთი ცხვედიაშვილი

აღნიშნული მასალა წარმოადგენს "საქართველოს ბავშვების" ინტელექტუალურ საკუთრებას და შესაბამისი საავტორო უფლება დაცულია